Formáli:

Í ÓL-þrautinni 6. júní var keppandi dæmdur úr leik á hlaupalegg vegna styttingar

Um þetta mál var upphaflega fjallað á vefsíðu Evu M. Einarsdóttur, og síðar á bloggsíðu undirritaðs. Í kjölfar þess var mér, 25. júlí, send ljósmynd af keppanda  í Hálfkarlinum 11. júlí sl. þar sem fram kemur að keppandinn hafi verið með Ipod á hlaupalegg, sem er i trássi við bandarísku þríþrautarreglurnar, sjá nánar í úrskurði. Sendandi vildi ekki senda þetta meinta brot inn sem ábendingu/fyrirspurn/kæru til keppnisstjórnar, heldur var spenntur að sjá hvað ég myndi gera við myndina. Ég sendi tafarlaust beiðni til keppnisstjóra um úrskurð í málinu og liggur sá nú fyrir:

“Hafnarfirði 25. júlí, 2010

Frá: Róbert Pétursson, keppnisstjóri Hálfkarlsins í Hafnarfirði, 11. júlí, 2010

Til: Keppnishaldarar, ÞRÍH

Efni: Ábending um brot á keppnisreglum. Úrskurður.

Keppnisstjóri fékk þann 25. júlí, ábendingu um meint brot á keppnisreglum sem átti sér stað í Hálfkarlinum, (Half Ironman Distance) 11. júlí, 2010.  Skv. meðfylgjandi ljósmynd hefur keppandi í kvennaflokki nr. 778 heyrnartól(ipod) en það er óheimilt samkvæmt 3.4(i) í reglum bandaríska þríþrautarsambandsins, væntanlega með öryggi keppenda í huga í fjölmennri keppni.

Almennar keppnisreglur höfðu fyrir keppnina verið birtar á triathlon.is og við þær var stuðst. Vegna fyrirspurnar nokkurra keppenda heimilaði keppnisstjóri notkun Ipod, einkum vegna fjölda keppenda og lengdar leiðar, enda er Ipod-notkun leyfð t.d. í þýsku reglunum.

Keppnisstjóri vill taka fram að almennt er miðað við að allar breytingar á úrslitum komi fram eigi síðar en tíu dögum eftir að keppni lýkur. Viðkomandi ábending kemur 14 dögum eftir keppni. Heimilt er að áfrýja úrskurði keppnisstjóra til sérstakrar kærunefndar.

Róbert Pétursson

keppnisstjóri”

Vegna þess sem ýjað er að í formála er þessi úrskurður ásamt greinargerð birtur hér. Öllum er frjáls að tjá sig um hann, enda er athugasemdakerfi opið.

Virðingarfyllst

Gísli Ásgeirsson

gisli (hja)internet.is

Hjólameistarinn er nýtt reiðhjólaverkstæði. Eigandi þess og helsti starfsmaður er Rúnar Theodórsson, áður kenndur við Markið. Rúnar hefur þjónustað þríþrautafólk undanfarin ár og er án efa einn mesti sérfræðingur landsins í hjólaviðgerðum og hjólastillingum.
Hjólameistarinn býður uppá alhliða viðgerðarþjónustu auk sérhæfðra viðgerða.  Rúnar hefur undanfarin ár boðið upp á stillingar á hjólum og auk þess hefur hann pakkað hjólum fyrir þríþrautafólk sem er að fara í keppnir erlendis. Í Hjólameistaranum verður einnig til sölu ýmis búnaður á hjól, bæði varahlutir annað sem tengist hjólum. 
Er þríþrautafólk hvatt til að nýta sér sérfræðiþekkingu og áratugareynslu Rúnars af hjólum og öðru þeim tengdum.

Hjólameistarinn er opinn frá 9 – 18 mánudaga til föstudaga.Verkstæðið er staðsett að Nýbýlavegi 28, rétt við Amarican Style og er síminn 892-1411.

Þann 18. júlí sl.  keppti Ragnar Guðmundsson fyrrum sundmaður og Íslandsmethafi í 1500m skriðsundi í ólympískri þríþraut í Hamborg. Þrautin er haldin af alþjóðaþríþrautasambandinu og er hluti af heimsmótaröðinni í ólympískri þríþraut. Í Hamborg kepptu margir af bestu þríþrautamönnum heims úr hópi atvinnumanna. Í hópi áhugamanna varð Ragnar nr. 14 af 2860 keppendum og nr. 3 í aldurshópnum 40-44 ára. Er þetta frábær árangur og verður spennandi að fylgjast með Ragnari í framtíðinni.

Árangur hans varð annars eftirfarandi eftir greinum og T1 og T2:
Sund: 20:10 mín
T1: 4:02
Hjól: 1:05,35 klst
T2: 2:41
Hlaup: 36,29 mín.

Nánari upplýsingar og úrslit er hægt að skoða inn á http://www.hamburg-triathlon.org/

Þríþrautardeild SH, ÍBH og Garpar, jafnvel í samstarfi við Bjart og ÞRÍH, bjóða upp á hálfa ÓL-þraut í Hafnarfirði 25. júlí og hefst hún stundvíslega kl. 09:30. Synt í Ásvallalaug og hjólað á Krísuvíkurvegi eins og í ÓL-þrautinni og hlaupið á sömu leið og í hálfkarlinum, nema snúið er við áður en komið er að hringtorginu.

Myndin sýnir hvernig hjólað er frá lauginni og út á Krísuvíkurveg og þar er farið alla  leið að skiltinu fyrir framan grjótnámurnar, þar sem malbikið endar efst uppfrá og síðan er farið niðureftir sömu leið og inn að laug.

Hlaupið er eftir gangstéttum í Vallahverfi sem leið liggur og að endakeilu þar sem brautarvörður stendur og sömu leið til baka. Á myndinni er græni punkturinn við hringtorgið en snúið er við hjá ljósastaur um 50 metrum frá torginu.

Skráning er á hlaup.com og nánari upplýsingar um greiðsluform þar.

Sunnudaginn 11. júlí fer fram aðal þríþrautakeppni sumarsins, Intersport hálfi járnkarlinn í Hafnarfirði. Að keppninni standa Íþróttabandalag Hafnarfjarðar (ÍBH) og Sundfélag Hafnarfjarðar, þríþrautadeild með aðkomu Þríþrautasambands Íslands.
32 keppendur eru skráðir til leiks í einstaklingskeppni og 2 lið í liðakeppninni. Nokkrir erlendir þátttakendur keppa að þessu sinni.

Búast má við hörkukeppni í karla- og kvennaflokki og ef veður verður gott má jafnvel búast við að Íslandsmet munu falla.

Vegalengdir eru: 1,9 km sund, 90 km hjól, 21.1 km hlaup.
Synt verður í Ásvallalaug, hjólað á Krísuvíkurvegi og hlaupið um Vallahverfið. Skiptisvæði er við Ásvallalaug og þar er einnig drykkjar- og þjónustustöð, salerni, gæsla fyrir hjól og dót. Einnig verður drykkjarstöð við hringtorg á Krísuvíkurvegi og við snúningspunk á hlaupaleið.

Karen Axelsdóttir og Ólafur Marteinsson héldu upp á aðild Íslands að ETU með því að keppa undir merkjum þjóðar vorrar á EM í þríþraut í Athlone um liðna helgi.  Rétt er að geta þess að nær öll formsatriði eru að baki og með fulltingi ÍSÍ erum við þríþrautarfólk á klakanum komin í samfélag þjóðanna. Við í grasrótinni verðum að fylgja þessu eftir með því að ganga í þríþrautardeildir á okkar svæðum og breiða út fagnaðarerindið með öllum ráðum. Meðbyrinn er ærinn og gaman að finna áhugann.

Í tilefni af þessum áfanga fór okkar fólk auðvitað mikinn á mótinu í Athlone þrátt fyrir ferleg veðurskilyrði eins og Karen nefnir í pistli sínum á Mbl.is. Þar er góð lýsing á aðstæðum og gengi þeirra og nokkuð ljóst að við betri skilyrði hefði árangurinn orðinn enn betri. Karen varð í öðru sæti í sínum aldursflokki og fjórða af öllum konum, en Ólafur varð nr. 13 í sínum flokki og nr. 71 af öllum körlum. Það er óhætt að segja að Íslendingar hafi stimplað sig rækilega inn á sínu fyrsta formlega Evrópumóti og nauðsynlegt að fylgja þessu eftir með þátttöku að ári.

Þrír Vest fylgdist með keppninni á netsíðu mótsins og birti frábæra samantekt um millitíma á leiðinni hjá þeim báðum. Áhugafólk um meðalhraða er bent á að kynna sér málið.