Mynd í eigu Steins, tekið af FB

Það var sannkölluð þríþrautarhelgi nú um helgina þegar stærsti þríþrautarviðburður í Evrópu átti sér stað í Köln.  Fjórir þátttakendur frá Íslandi tóku þátt í ýmsum vegalengdum.  Þeir Steinn Jóhannsson og Ásgeir Elíasson tóku þátt þátt í Ironman vegalengd, Steffi Gregersen tók þátt í Ironman 70.3 og Torben Gregersen tók þátt í Ólympískri vegalengd. 

Steinn Jóhannsson stóð sig gríðarlega vel, Steinn bætti sinn besta tíma um 14 mínútur og 7 sekúndur og bætti Íslandsmet Einars Jóhannssonar sem hann setti í Roth 1996 um sjö sekúndur.  Tími Steins var 9:24:46 og náði hann öðru sæti í sínum aldursflokki og 14 sæti yfir heildina. Áhugasamir geta skoðað æfingadagbók Steins á hlaup.com en það er vel þekkt að hann er duglegur drengur.  Ásgeir Elíasson var mjög sterkur framan að en samkvæmt umræðuþræði Kölnarkarlsins á hlaup.com þjáðist Ásgeir af magakrömpum þegar líða fór á hlaupið og telst hann mjög sterkur að hafa náð að klára yfirleitt. Tími Ásgeirs var 13:56:37. æfingadagbók Ásgeirs má nálgast hér.

Þríþrautarhjónin Steffi og Torben Gregersen voru að gera góða hluti, Steffi náði sínum besta árangri í Ironman 70.3 og Torben náði tímanum 2:08:28 í Ólympískri vegalengd og 6 sæti yfir heildina og þriðja sæti í sínum aldursflokki.

Hér er hlekkur í picasa myndaalbúm Steins, þar eru myndir af öllum keppendum og aðstandendum keppenda en þeir eiga jú stóran þátt í þessu öllu saman.

Hér er hlekkur í afrekaskrá

Hér er hlekkur í skjámynd af úrslitum fyrstu 16 sætunum í Ironman vegalengd.

Challenge Copenhagen 2010

Sunnudaginn 15. ágúst munu 17 íslendingar taka þátt í Járnkarli í Kaupmannahöfn.  Aldrei hafa fleiri Íslendingar tekið þátt í slíkri keppni.  Keppnin samanstendur af 3,8km sundi / 180km hjóli / 42,2km hlaupi.  Hópurinn er búinn að æfa vel og því allt útlit fyrir góðan árangur.  Hægt verður að fylgjast með keppendum á www.challengecopenhagen.com á keppnisdegi en auk þess verður fylgst með  á www.triathlon.is og www.hlaup.com  

Intersport hálfi járnkarlinn var haldin 11. júlí 2010. Sett voru Íslandsmet bæði í karla og kvennaflokki, tíminn í karlaflokki er 4:23:13 og í kvennaflokki er hann 5:20:11
Hér fyrir neðan má sjá flott myndand af viðburðinum.

Intersport hálfi járnkallinn
Sunnudaginn 11. júlí fer fram  hálfur járnkarl í Hafnarfirði og hefst keppnin kl. 8:30 við Ásvallalaug. Að  keppninni standa Íþróttabandalag Hafnarfjarðar (ÍBH) og Sundfélag Hafnarfjarðar, þríþrautadeild með aðkomu Þríþrautasambands Íslands.
Vegalengdir eru: 1,9 km sund, 90 km hjól, 21.1 km hlaup.
Synt verður í Ásvallalaug, hjólað á Krísuvíkurvegi og hlaupið um Vallahverfið. Skiptisvæði er við Ásvallalaug og þar er einnig drykkjar- og þjónustustöð, salerni, gæsla fyrir hjól og dót. Einnig verður drykkjarstöð við hringtorg á Krísuvíkurvegi.
Synt verður í 50 metra laug, hjólaðir 6 hringir á Krísuvíkurvegi og hlaupaleiðin verður fjórir hringir. Boðið verður uppá brautarskoðun þann 10. júlí. 
Skráning verður opin til og með 8. júlí. Einnig er hægt að skrá lið til leiks. Verðlaun verða veitt fyrir:
·         Besta tíma í karla- og kvennaflokki.
·         Fyrsta lið.
·         Fyrstu þrjú sætin í flokki 39 ára og yngri.
·         Fyrstu þrjú sætin í flokki 40 ára og eldri.
·         Auk þess fá allir þátttökuverðlaun.

Skráning fer fram á hlaup.is og greiða þarf keppnisgjald við skráningu, tilgreina þarf tíma fyrir 1,9 km sund með því að senda tíma á mótshaldara. Skráningargjald er kr. 6000, bæði fyrir einstakling- og liðakeppni. Nánari upplýsingar er að finna hér og einnig veitir Róbert (robert.petursson@gmail.com) frekari upplýsinga.

Karen AXELSDOTTIR