Bróðir Stefán skrifar frá Kaupmannahöfn:

“Ég var að rekast á upplagt efni fyrir þá sem fara til Kaupmannahafnar, Challenge Copenhagen. Um er að  ræða nokkur myndbönd, sem mótshaldarar (þar á meðal Thorbjörn Sindballe) hafa gert um keppnina.Þarna er ýmis fróðleikur, bæði fyrir keppendur og stuðningslið.

Góð lýsing af leiðunum er í vídeó #7 og svo er líka fjallað um hvaða orkudrykkir og orkubitar eru í boði.”

Þetta er á síðu danska þríþrautarsambandsins.

Formáli:

Þessa samantekt sendi ég keppnisstjórum og aðstandendum Kópavogsþrautarinnar til yfirlesturs og upplýsinga. Þeir voru sammála mér og höfðu að auki tekið saman sinn lista yfir það sem betur mátti fara og sent keppendum. Þetta var fyrsta þraut ársins með tilheyrandi vorbrag og lærdómsrík eins og flestar keppnir.

“Reglur og refsingar

Ég var starfsmaður Kópavogsþrautarinnar 16. maí í vor. Þar voru keppendur fleiri en nokkru sinni fyrr og gekk mikið á á skiptisvæðum og víðar. Ég bloggaði um keppnina, gaf henni 4 banana af 5 , vegna neðangreindra atriða:

“Ekki voru allir með reglurnar á hreinu og hjá helmingi keppenda sáu tímaverðir ekki númerin á treyjunum sem er jú grundvöllur réttrar tímaskráningar, og sitthvað fleira mátti finna að, ……

Nokkrir villtust á hlaupaleiðinni og sumir hjóluðu bara einn eða tvo hringi. …”

Karen Axelsdóttir  fjallaði einnig um keppnina í pistil á Mbl.is og þar segir: “P.s skemmtilegt að sjá suma þarna bera að ofan með ekkert númerabelti, slíkt yrði DQ hér ” (http://mbl.is/mm/folk/serefni/pistlar/karen/entry.html?entry_id=1056464

Keppnisstjórn var kunnugt um þetta og þeir sem hjóluðu of stutt, voru dæmdir ógildir eins og segir á úrslitasíðunni, alls fjórir.

Þeir sem fóru út úr brautinni á hlaupaleiðinni, sennilega þrír keppendur, fóru ekki inn á hana á sama stað og hefðu átt að vera dæmdir úr leik, sbr. úrskurð í ÓL-þrautinni í Hafnarfirði. Svo var ekki gert.

DQ vegna númeraleysis á leið út af skiptisvæði hefði komið niður á rúmlega 10 keppendum.

Alls hefðu um 25 manns fengið DQ, eða um þriðjungur keppenda.

Vegna umræðna um reglur og refsingar, keppnisstjórn og þöggun og gildi þess að hafa allt uppi á borðinu, er þessi saga sögð. En niðurstaða dagsins var eins og fram kemur í athugasemd við þessa bloggfærslu mína… “að þegar á heildina er litið var þetta fyrst og fremst gaman. Ég heyrði ekki annað á keppendum en þeir væru ánægðir með daginn og það er hugur í mönnum fyrir næstu þraut.”

Allar keppnir sumarsins fara í reynslubankann og keppnir næsta sumars verða skipulagðar, skemmtilegar og eftir reglunum og um það skulum við sameinast. J Við skulum heldur ekki gleyma að við erum áhugafólk með ánægju og gleði að leiðarljósi. Séra Friðrik sagði líka: “Keppnin má aldrei bera fegurðina ofurliði.”

Hér mætti líka hafa mörg orð um hvað HEFÐI átt að gera, og kannski verða einhverjir til þess. Þá má vitna í séra Hallgrím Pétursson og segja:

“Það sem helst hann varast vann,

varð þó að koma yfir hann.”

P.S. Að sjálfsögðu er opið fyrir athugasemdir. Hér er ekki farið í manngreinarálit. Ég vek einnig athygli á færslu minni um þetta hérna.

Virðingarfyllst

Gísli Ásgeirsson

gisli(hja)internet.is

Formáli:

Í ÓL-þrautinni 6. júní var keppandi dæmdur úr leik á hlaupalegg vegna styttingar

Um þetta mál var upphaflega fjallað á vefsíðu Evu M. Einarsdóttur, og síðar á bloggsíðu undirritaðs. Í kjölfar þess var mér, 25. júlí, send ljósmynd af keppanda  í Hálfkarlinum 11. júlí sl. þar sem fram kemur að keppandinn hafi verið með Ipod á hlaupalegg, sem er i trássi við bandarísku þríþrautarreglurnar, sjá nánar í úrskurði. Sendandi vildi ekki senda þetta meinta brot inn sem ábendingu/fyrirspurn/kæru til keppnisstjórnar, heldur var spenntur að sjá hvað ég myndi gera við myndina. Ég sendi tafarlaust beiðni til keppnisstjóra um úrskurð í málinu og liggur sá nú fyrir:

“Hafnarfirði 25. júlí, 2010

Frá: Róbert Pétursson, keppnisstjóri Hálfkarlsins í Hafnarfirði, 11. júlí, 2010

Til: Keppnishaldarar, ÞRÍH

Efni: Ábending um brot á keppnisreglum. Úrskurður.

Keppnisstjóri fékk þann 25. júlí, ábendingu um meint brot á keppnisreglum sem átti sér stað í Hálfkarlinum, (Half Ironman Distance) 11. júlí, 2010.  Skv. meðfylgjandi ljósmynd hefur keppandi í kvennaflokki nr. 778 heyrnartól(ipod) en það er óheimilt samkvæmt 3.4(i) í reglum bandaríska þríþrautarsambandsins, væntanlega með öryggi keppenda í huga í fjölmennri keppni.

Almennar keppnisreglur höfðu fyrir keppnina verið birtar á triathlon.is og við þær var stuðst. Vegna fyrirspurnar nokkurra keppenda heimilaði keppnisstjóri notkun Ipod, einkum vegna fjölda keppenda og lengdar leiðar, enda er Ipod-notkun leyfð t.d. í þýsku reglunum.

Keppnisstjóri vill taka fram að almennt er miðað við að allar breytingar á úrslitum komi fram eigi síðar en tíu dögum eftir að keppni lýkur. Viðkomandi ábending kemur 14 dögum eftir keppni. Heimilt er að áfrýja úrskurði keppnisstjóra til sérstakrar kærunefndar.

Róbert Pétursson

keppnisstjóri”

Vegna þess sem ýjað er að í formála er þessi úrskurður ásamt greinargerð birtur hér. Öllum er frjáls að tjá sig um hann, enda er athugasemdakerfi opið.

Virðingarfyllst

Gísli Ásgeirsson

gisli (hja)internet.is

Hjólameistarinn er nýtt reiðhjólaverkstæði. Eigandi þess og helsti starfsmaður er Rúnar Theodórsson, áður kenndur við Markið. Rúnar hefur þjónustað þríþrautafólk undanfarin ár og er án efa einn mesti sérfræðingur landsins í hjólaviðgerðum og hjólastillingum.
Hjólameistarinn býður uppá alhliða viðgerðarþjónustu auk sérhæfðra viðgerða.  Rúnar hefur undanfarin ár boðið upp á stillingar á hjólum og auk þess hefur hann pakkað hjólum fyrir þríþrautafólk sem er að fara í keppnir erlendis. Í Hjólameistaranum verður einnig til sölu ýmis búnaður á hjól, bæði varahlutir annað sem tengist hjólum. 
Er þríþrautafólk hvatt til að nýta sér sérfræðiþekkingu og áratugareynslu Rúnars af hjólum og öðru þeim tengdum.

Hjólameistarinn er opinn frá 9 – 18 mánudaga til föstudaga.Verkstæðið er staðsett að Nýbýlavegi 28, rétt við Amarican Style og er síminn 892-1411.

Þann 18. júlí sl.  keppti Ragnar Guðmundsson fyrrum sundmaður og Íslandsmethafi í 1500m skriðsundi í ólympískri þríþraut í Hamborg. Þrautin er haldin af alþjóðaþríþrautasambandinu og er hluti af heimsmótaröðinni í ólympískri þríþraut. Í Hamborg kepptu margir af bestu þríþrautamönnum heims úr hópi atvinnumanna. Í hópi áhugamanna varð Ragnar nr. 14 af 2860 keppendum og nr. 3 í aldurshópnum 40-44 ára. Er þetta frábær árangur og verður spennandi að fylgjast með Ragnari í framtíðinni.

Árangur hans varð annars eftirfarandi eftir greinum og T1 og T2:
Sund: 20:10 mín
T1: 4:02
Hjól: 1:05,35 klst
T2: 2:41
Hlaup: 36,29 mín.

Nánari upplýsingar og úrslit er hægt að skoða inn á http://www.hamburg-triathlon.org/

Þríþrautardeild SH, ÍBH og Garpar, jafnvel í samstarfi við Bjart og ÞRÍH, bjóða upp á hálfa ÓL-þraut í Hafnarfirði 25. júlí og hefst hún stundvíslega kl. 09:30. Synt í Ásvallalaug og hjólað á Krísuvíkurvegi eins og í ÓL-þrautinni og hlaupið á sömu leið og í hálfkarlinum, nema snúið er við áður en komið er að hringtorginu.

Myndin sýnir hvernig hjólað er frá lauginni og út á Krísuvíkurveg og þar er farið alla  leið að skiltinu fyrir framan grjótnámurnar, þar sem malbikið endar efst uppfrá og síðan er farið niðureftir sömu leið og inn að laug.

Hlaupið er eftir gangstéttum í Vallahverfi sem leið liggur og að endakeilu þar sem brautarvörður stendur og sömu leið til baka. Á myndinni er græni punkturinn við hringtorgið en snúið er við hjá ljósastaur um 50 metrum frá torginu.

Skráning er á hlaup.com og nánari upplýsingar um greiðsluform þar.