![Guðlaug Edda í 20. sæti á Evrópumeistaramótinu í Glasgow](https://triathlon.is/assets/uploads/blog/830/fcc03f0ff8819cf5ac215de63bee7062.jpg)
9 August 2018 20:00
Guðlaug Edda Hannesdóttir keppti í dag á Evrópumeistaramótinu í þríþraut sem fram fór í Glasgow. Keppt var í ólympískri vegalengd sem samanstendur af 1500 m sundi, 40 km hjólreiðum og 10 km hlaupi og mættar voru til leiks 45 af sterkustu þríþrautarkonum Evrópu. Þetta er í fyrsta sinn sem Íslendingar eiga fulltrúa í Elite flokki á svo sterku þríþrautarmóti.
Guðlaug Edda byrjaði keppnina vel og átti gríðarsterkt sund, synti fyrri hring 9:28 og seinni á 9:20 og var 10. kona eftir sundið. Skipting yfir á hjól gekk einnig vel, og allur hjólahlutinn gekk frábærlega en Guðlaug Edda hélt sinni stöðu allan tímann. Þar hjólaði hún í stórum og sterkum hóp sem elti þrjár fremstu konur. Guðlaug Edda kom 14. inn á skiptisvæðið áður en skipt var í hlaupið en það voru um 20 konur að koma inn á sama tíma. Í hlaupinu dreifðist meira úr keppendum og var Guðlaug Edda í 19. sæti eftir fyrsta hring af þremur en hún hljóp þar meðal annars með Evrópumeistaranum frá 2016, India Lee. Hún tók framúr Lee á endasprettinum og endaði í 20. sæti á tímanum 2:05:19, sannarlega frábær árangur hjá Guðlaugu Eddu á svo sterku móti og sýnir hversu sterk þríþrautarkona hún er orðin.
Sigurvegari í dag var Nicola Spirig frá Sviss, gullverðlaunahafi frá Ólympíuleikunum 2012 og silfurverðlaunahafi frá Ríó. Önnur varð Jess Learmonth frá Bretlandi og Cassandre Baugrand var þriðja.
Sigurvegari í dag var Nicola Spirig frá Sviss, gullverðlaunahafi frá Ólympíuleikunum 2012 og silfurverðlaunahafi frá Ríó. Önnur varð Jess Learmonth frá Bretlandi og Cassandre Baugrand var þriðja.
![](/assets/uploads/ckfinder/images/ETU%20Edda.jpg)
![](/assets/uploads/ckfinder/images/Edda%20ETUhlaup.jpg)
Hákon Hrafn Sigurðsson
Síðast breytt þann 10. August 2018 kl: 01:55 af Hákon Hrafn Sigurðsson