Hin sögufræga Heiðmerkurtvíþraut fór fram um helgina í fyrsta skipti eftir 5 ára hlé.

Keppnin fór fyrst fram fyrir 16 árum og var haldin að vori og hausti í 10 ár. Fyrstu árin voru Burkni Helgason og Eva Skarpaas sigursæl í þessari þraut en hún var helst þekkt fyrir það að bæði hlaupar og hjólreiðafólk mætti gjarnan í keppnina og keppti við þríþrautarfólk. Þannig var það einnig núna þegar fremstu hjólarar okkar mættu til leiks, þau Ágústa Edda, Eyjólfur Guðgeirsson og Jón Arnar Óskarsson. Í þessari tvíþraut eru fyrst hlaupnir tveir hringir (3,8km) á stígum í Heiðmörk og svo skipt yfir í tvo hjólahringi (14,5km) á Heiðmerkurvegi og Strípsvegi og svo endað með því að hlaupa sömu tvo haupahringi og í upphafi. Aðstæður voru mjög góðar um helgina og góðir tímar náðust í báðum flokkum. Í kvennaflokki varð Ágústa Edda sigurvegari á tímanum 66:55, Margrét Pálsdóttir varð önnur um 8 mínútum á eftir Ágústu og Katrín Lilja Sigurðardóttir varð í 3. sæti rétt á eftir Margréti. Í karlaflokki sigraði Hákon Hrafn Sigurðsson á tímanum 59:05, Jón Arnar Óskarsson varð annar á tímanum 61:35 og Steindór Eiríksson varð þriðji á tímanum 62:20. Brautarmetin stóðu áfram en þau eiga Hákon Hrafn frá hausti 2014, 56:57, og Birnar Björnsdóttir frá vori 2012, 64:35. Það er frábært að sjá Þríþrautardeild Ægis endurvekja þessa keppni og öll umgjörð var til fyrirmyndar eins og við var að búast hjá þessu öfluga þríþrautarfélagi.