Sprettþraut 3SH fór fram um helgina í bullandi meðvindi en keppnin er önnur keppnin í bikarkeppni ÞRÍ.

Keppt var í hálf ólympískri þríþraut þar sem sundið er 750 metrar, hjólaðir 20 km og endað á 5 km hlaupi.

Í karlaflokki sigraði Sigurður Örn Ragnarsson örugglega en annar varð Stefán Karl Sævarsson eftir mikla baráttu við Hákon Hrafn Sigðursson en þeir koma allir úr Breiðabliki.

Mikil spenna var í kvennaflokki þar sem Kristín Laufey Steinadóttir,  Sædís Björk Jónsdóttir og Brynja Dögg Sigurpálsdóttir komu allar á svipuðum tíma upp úr sundinu en þær eru allar úr Ægi. Á hjólinu tóku Sædís og Brynja forystu og kom Brynja fyrst inn á skiptisvæðið en þar var Sædís fljótust og byrjaði hlaupið fremst. Kristín Laufey var hins vegar sterktust í hlaupinu og sigraði að lokum með mínútu forskti á Sædísi sem varð önnur og Brynja endaði svo þriðja.

Í flokki 20-23 ára sigruðu þau Kristín Helga Hákonardóttir SH og Viktor Ingi Birgisson og í unglingaflokki 16-19 ára sigruðu Ylfa Ásgerður Eyjólfsdóttir Ægi og Jakob Ingi Reynisson UMFN.

Frábær keppni hjá 3SH og allt til fyrirmyndar við framkvæmd keppninnar.