Sprettþraut 3SH var haldin sunnudaginn 7. júní sl. í blíðskaparveðri.

Keppnin var önnur keppnin í bikarmótaröð Þríþrautarsambands Íslands.

Keppendur hófu keppni á 750 metra sundi í Ásvallalaug. Að því loknu hjóluðu þeir 20 km um Krýsuvíkurveg og lauk keppninni með 5 km hlaupi um Vellina.

Vel var mætt til leiks og fjölmörg ný nöfn voru á keppendalistanum. Það sama má segja um verðlaunapallinn þar sem nokkrir keppendur stigu á pall í fyrsta sinn.

Í kvennaflokki sigraði Ásta Rún Ingvadóttir úr Ægi glæsilega á tímanum 1:14:34. Ásta er á sínu fyrsta ári í þríþraut og sýndi mikinn styrk í hlaupinu, þar sem hún hljóp sig úr þriðja sæti eftir hjólreiðarnar upp í efsta sætið með frábærum 5 km hlaupatíma, 20:00. Í öðru sæti, tæpri mínútu á eftir Ástu, varð Ewa Przybyla úr Breiðabliki sem hefur snúið sterkt til baka eftir barnsburð. Þriðja varð Eydís Ósk Kolbeinsdóttir úr Ægi, einnig á sínu fyrsta ári í þríþraut. Eydís átti frábært sund og kom fyrst allra upp úr lauginni á tímanum 10:02.

Í karlaflokki voru kunnugleg andlit í tveimur efstu sætunum. Sigurður Örn Ragnarsson úr Breiðabliki sigraði með yfirburðum á glæsilegum tíma, 57:37. Í öðru sæti varð Hákon Hrafn Sigurðsson, einnig úr Breiðabliki, sem virðist vera að ná sér vel á strik á ný eftir meiðsli. Þriðji varð Jakob Þór Magnússon úr Ægi. Jakob er á sínu fyrsta ári í þríþraut og hefur þegar sýnt að hann er keppandi sem vert verður að fylgjast með á komandi árum.

Að vanda var keppnin afar vel heppnuð og eiga keppnishaldarar 3SH ásamt fjölmörgum sjálfboðaliðum mikið hrós skilið fyrir glæsilegt mótahald.